شكون لي عليه اللومة .. بقلم أ/ الحساني عبدالعزيز

 شكون لي عليه اللومة ....

قال ليها : 

انت يالمرا .. اعتبرتك ختي .. نحكي ليك الحقيقة ...

لأني درت فيك الثقة ...

لكن علاش خنتي العاهد ..

قالت ليه :

أنا لي خنت العاهد ولا أنت .. نسيتي بلي تبدلتي ..

فين ديك الورود .. فين ديك العهود ..

والشاهد على كلامي الرب المعبود ..

حلفتي بلي الديرني فعينيك .. والنوم  بلا بيا ما يحلا ليك ..

قال ليها : 

وانت انسيتي بلي كنتي كي لحمامة ..

كي لقطيطة فالدار .. ما الديري الحاجة إلا بالشوار ..

ما تقدري تهزي فيا عينيك .. أو تسمعي لكلام لي نقول ليك ..

غير ندق فالباب تخرجي بابتسامة .. متبتة بالعقل او لفهامة ..

ليوم آش طرا ليك .. واشنو زاد عليك ..

قالت ليه : 

ياك أراجلي لعزيز .. هاد الشي لي تفكرتي .. 

وانسيتي عليا ما دوزتي ..

سبع ايام دالباكور سالات .. 

ولات الدار عندك غير محطة استراحة ..

داخل خارج بلا او قات .. كتقلب غير على السبات ..

ما بقيت معمرة ليك العين .. او نسيتي العشرة أو السنين ..

قال ليها :

انت يالمرا لي ظالماني .. غير نخرج تسوليني تاني ..

وليت حاس معاك فالدار بلي وحداني ..

مدياها فحبابك او صحابك .. وانا نسياني ..

تلبسي أحسن ما عندك وانت خارجة .. 

أو فالدار منوضة عجاجة ..

كتحزمي راسك بدرة .. أو تقلال فيك الهضرة ..

واش ماشي من حقي نشوف .. الكلمة ما ناقصة من لحروف .

قالت ليه : 

هاد الشي ما منوش .. غير درتيها سبة .. 

أو نقصات عندك  لمحبة ..

أو توحشتي حياة الغربة ..

أو شربة هنا أو لهيه شربة ..

تبدلتي بزاف .. حتى وليت منك نخاف ..

عاد بانوا فيا لعيوب .. ولا شايف الصورة بالمقلوب ..

قال ليها : 

سمعيني مزيان .. ياكما تحلوا فعينيك البيبان ..

أو وليت نبان ليك بلي أنا عيان .. قديم من ناس زمان ..

راك انت لي وليتي تشوفي لفوق .. ولا ضصروك بالحقوق ..

قبل ما الديري الدراري .. كنتي بيا كتراري ..

أو معمر ليك العين .. أو دايرة بحساب السنين ..

ليوم قساحوا جناحك .. ما بقيت نبان قدامك ..

سرنا صبح مفضوح .. قبل ما بيه نبوح ..

ولات أفكاري بلدية .. أو ما كنعرف فالرومانسية ..

أو ذكرياتي صبحات منسية ..

هنا  دخلت على الخط ... أوقلت :

سمعوني انتما بجوج .. باركة ما تغسلوا فوسخكم قدام الناس تكلموا شوية بإحساس .. أو كولا يتحمل المسؤولية ..

العيب فيكم يجوج .. من نهار بديتو طالعين فالدروج ..

كولا نسى لاخر .. عاد بانو ليكم لعيوب ..

كنتو شحال هادي كتگلسوا فالطابلة ..

والصعبة تولي ساهلة ..

غاب بيناتكم الإحترام ..

أو كتبعدوا على بعضياتكم عام مورى عام ..

غاب بيناتكم الحوار .. الوقت لي كنتو غير بجوج فالدار ..

انت هملتي راسك .. وانت شفتي بعيد ..

وانسيتي بلي فدارك يكون العيد ..

دابة نساوا الماضي .. أو عيشوا لي انتما فيه ..

أو الجاي يعلم بيه ربي .. هو لي عالم بلي مخبي ..

باقي تصلحوا لي فات .. باقي تستغلوا لوقات ..

ديروا راسكم يالله تلاقيتوا ..

تحاوروا أو تحاوروا فكل كبيرة أو صغيرة ..

رفعوا وثيرة الإهتمام .. زيدوا للأمام ..

ها لكتاب مفتوح بصفة جديدة ..

أو حتى حد فيكم ما يرد عليا لكلام .

           ( الحساني عبد العزيز )